الأرض بتتكلم عربى الآن
والناس ثوار حراس
ف كل مكان
وأمان مبدور على وش الصبح
المتبعتر فى وشوش الناس
زغاريد احلام
والحلم خلاص
أصبح تراتيل
تلف مآذن
وكنايس
تضرب أجراس
وسلام للروح من قلب الجيش
وأنا وامى واخويا
بندمع من فرحة عيد
ترميها النسمة البردانة
فى قلوب مجاريح
فنصيح
حق المصابيح
ونسافر ويا أغانى النور
والكلمة الحق
والنفس الطاهر
والغيط المليان بالخير
وتسافر أمى ويانا فى أخويا
وتبص لفوق
ونبص معاها
وتنهنه للريح الجاية ساعات
ونطبطب بقلوبنا عليها
فتقول
أنا مش حزنانه عليه يا أولاد
ابنى اللى أخوكم
ضحى لأجل العصفور الأخضر ما يعود
يفرد جناحاته
للريح
فيروح ويعود
أنا مش حزنانه عليه يا حبايبى
ما هو نوّر دربى
وخلانى أشوف الصبح الغايب
وأفتح من بعد ما كنت
خلاص هاروح
ولا أشفشى النخلة المفرودة
بطولها قدام البيت
ولا أشفشى البسمة الموجودة
فى عينيكو الآن
ولا أشفشى اللى بيحصل فى بلادنا
من تونس
وجزاير عدن وصنعاء
عمان
الأرض خلاص
يا حبايب قلبى
بتتكلم عربى الآن
ليست هناك تعليقات:
إرسال تعليق