من حتة طين
مخلوطة بمية نيلك جيت
وعشقت غناك ومواويلك
وعشقت الليل والنور
وعشقت النسمة
اللى تغازل وش الصفصافة
الضليلة
والعصفور الأخضر
المرفرف فوق أغصانها
يشبه عصافير الجنه
وعشقت
المسقى
بطحالبها
والبقرة اللى بتسبح فيها
وعشقت الخاله اللى بتزرع الحدود
بالتوم واللوبيا
وعشقت الصياد النيلى
وهو بيفرد قبل ادان الفجر
وبين احضان البرد
خيوط الجوبيا
وعشقت طيورك
مفروده على كل سطوحك
وعشقت جدودى
وهمه فاردين ع الحيط الخيط
لاجل حصيرة جبنه
وعشقت شتيمهم ليه
لما اصفى البراد من تفله
واكبه
عاوزين دور تانى منه
شاي مزر ود
ومغلي على نار أحلامهم
كانت أحلام مشروعه
لقمة عيش منزوعة الذله
وحتة أرض
يداعبوا فيها جمال الطله
يسقيها الجد
من عرقه
المتقرص ملح
ويورى العالم كله فنون الفلح
وينام ع الأرض
مزاجه تمام
لا يكون داين يوم لحد
ولا حتى يكون لحد مدين
فينام مرتاح البال
كانت أحلام مشروعه
لما يتوجه يدعاه لله
لأجل البقرة التعبانه تطيب
وتشاركه الناس فى دعاه
كانت أيام
عاشوا حافظين للعهد
العمر داكله
ما زاغوا فى يوم على حد
ولا بيحبوا حد يزوغ على حد
وإحنا الأحفاد
نتزايد زى السيل
ولا عدنا
بنعرف نركب ضهر الخيل
ولا نزرع أرض
العقل خلاص
تشتت بين الأوهام
أصبحنا رهينة
والجد خلاص
هنااااااااااااااااااااااااك....
بين الجدران الخرسانه
تهالك
لكن متمالك
وبيسأل جدى
ليه الواحد يلبس توب اكبر من توبه
انا ياما حكيت وقلت
ولا حد بيسمع
والحال.......... أوحال
وعصاية جدى خلاص
مش عادت قادره
ضربتها السوسه
وانزفت امى
لعدوى عروسه
ولأنى
حتة طين مخلوطه بمية نيلها
ولأنى عشقت ضحاها وليلها
ولأنى عشقت الغيط والبيت
ولأنى عشقت فداها الموت
ضحيت
هناك 5 تعليقات:
ايه يا سيدى الجمال ده بجد حاجه لو قولنا روعه هيبقى شويه عليك عشان بجد مفيش كلام يكفيك بجد بجد كاتب عملاق وندعوا لك انا تتواصل فى هذا المشوار والله بجد حاجه جميله وربنا يوفقك وماشاء الله على الكلام بتاعك والله ربنا يزيدك ويحميك
اشكرك أخى الكريم / أحمد بك خليل
على تعليقك فهذا أسلوبك
لك كل الود وعميق المحبة
استاذي الرائع \محمود الديداموني ..
بجد أسلوب جميل ..
ورائع ف الكتابة ..
أنا قريت النص بجد غرقت في روعته ..
ربنا يبارك في ابداعك ..
د/ أسماء على
أشكرك على ذوقك الجميل
وأتمنى أن أكون عند حسن الظن
دمت كاتبة متألقة أختى الجميلة
ربما نجد مداخلات أخرى
تثرى النص
أنتظر العديد من المداخلات
إرسال تعليق